Ա Ր Ձ Ա Ն Ա Գ Ր ՈՒ Թ Յ ՈՒ Ն N 1
ՙՍՆԱՆԿՈՒԹՅԱՆ ԳՈՐԾԵՐՈՎ ԿԱՌԱՎԱՐԻՉՆԵՐԻ ԿՈԼԵԳԻԱ՚
ինքնակարգավորվող կազմակերպության դիտորդ խորհրդի և
կարգապահական հանձնաժողովի 03.05.2011թ. ընդլայնված նիստի
Մասնակցությամբ`
Կարգապահական հանձնաժողովի նախագահ` Խաչատուր Ղահրամանյանի
Հանձնաժողովի անդամներ` Աղասի Արսենյանի, Արման Սարգսյանի, Սոֆյա Դավթյան
Դիտորդ խորհրդի նախագահ` Հրանտ Ղամբարյանի
Խորհրդի անդամներ` Խաչիկ Նազարյանի, Վահագն Ավագյանի, Արսեն Չիտչյանի, Գևորգ Ավագյանի, Լևոն Պետրոսյանի, Ռուբեն Խալաթյանի
Օրակարգում
Սնանկության գործերով կառավարիչ Ռոբերտ Արամի Մարգարյանին կարգապահական պատասխանատվության ենթարկելու վերաբերյալ հարցի քննարկումը:
Նիստին ներկայացել էին դիմումատու` Արմեն Մկրտչյանը և ՙԱրմաս՚ ՍՊԸ-ի սնանկության կառավարիչ Ռոբերտ Արամի Մարգարյանը:
Նիստը բացեց դիտորդ խորհրդի նախագահ Հ.Ղամբարյանը, որը և ներկայացրեց ՙՍԳԿԿ՚ ԻԿԿ մուտք եղած դիմումը: Դիտորդ խորհրդի նախագահ Հ. Ղամբարյանը առաջարկեց դիտորդ խորհրդի անդամներին քվեարկել սնանկության գործերով կառավարիչ Ռոբերտ Արամի Մարգարյանի նկատմամբ կարգապահական վարույթ հարուցելու հարցը: Խորհրդի անդամները միաձայն որոշեցին` հարուցել կարգապահական վարույթ:
Այնուհետև դիտորդ խորհրդի նախագահ Հ. Ղամբարյանը առաջարկեց կարգապահական հանձնաժողովին անցնել օրակարգի հարցի քննարկմանը:
Կարգապահական հանձնաժողովի նախագահ Խ.Ղահրամանյանը առաջարկեց դիմումատուին ներկայացնել դիմումը, այնուհետև հարցեր ուղղել վերջինիս, որից հետո միայն լսել ՙԱրմաս՚ ՍՊԸ-ի սնանկության գործով կառավարիչ Ռոբերտ Մարգարյանին:
Արմեն Մկրտչյանը հրապարակեց ՙՍԳԿԿ՚ ԻԿԿ 21.04.2011թ. ներկայացրած դիմումը և խնդրեց կառավարիչ Ռոբերտ Մարգարյանին ենթարկել կարգապահական պատասխանատվության և կիրառել տույժեր, այդ թվում նաև դրամական:
Ինչպես կարգապահական հանձնաժողովի, այնպես էլ դիտորդ խորհրդի անդամները կարգապահական վարույթի շրջանակներում հարցեր ողղեցին դիմող Արմեն Մկրտչյանին և ՙԱրմաս՚ ՍՊԸ-ի սնանկության կառավարիչ Ռոբերտ Արամի Մարգարյանին: Հարցերը վերաբերում էին ՙԱրմաս՚ ՍՊԸ-ի սնանկության վարույթին: Մասնավորապես ում կողմից է կնքվել վարկային, գրավի և երաշխավորության պայմանագրերը, ով է ներկա եղել նախապես հայտարարված գույքագրման ժամանակ և արդյոք գույքագրում կատարելու համար ՙԱրմաս՚ ՍՊԸ-ի սնանկության կառավարիչ Ռոբերտ Մարգարյանը կատարել է պատշաճ ծանուցում:
Դիմող` Արմեն Մկրտչյանը կատարված հարցադրումների վերաբերյալ հայտնեց իր դիտողությունները, նշելով, որ իբր հարցերը չեն վերաբերվում բուն դիմումին, քանի որ դրանք արդեն իսկ հաստատված են օրինական ուժի մեջ մտած դատական ակտով /ՀՀ վճռաբեկ դատարանի 04.03.2011թ. որոշում/ և որ այն արդեն քննարկման առարկա դառնալ չի կարող: Միաժամանակ հայտնեց, որ բոլոր բարձրացված հարցերի վերաբերյալ պատճառաբանությունները արդեն իսկ նշվել են իր կողմից դիմումը ներկայացնելիս:
Դիմողի այն հայտարարությանը, որ իբր հանձնաժողովի անդամները քննարկում են օրինական ուժի մեջ մտած դատական ակտը, կարգապահական հանձնաժողովի նախագահ Խ.Ղահրամանյանը հայտնեց, որ հանձնաժողովը չի քննարկում օրինական ուժի մեջ մտած դատական ակտը և դրանով հաստատված հանգամանքները և իրավասու էլ չի այն քննարկել, սակայն հանձնաժողովը պարտավոր է ապահովել փաստական հանգամանքների բազմակողմանի, լրիվ և օբյեկտիվ քննարկումը` բացահայտելով գործի բոլոր հանգամանքները:
Դիմումը վերաբերում է ՙԱրմաս՚ ՍՊԸ-ի սնանկության վարույթին և հետևաբար կարգապահական հանձնաժողովը պետք է քննարկի վարույթին առնչվող բոլոր հանգամանքները, այդ թվում կառավարիչ Ռոբերտ Մարգարյանի կողմից կատարված գործողությունները:
ՙԱրմաս՚ ՍՊԸ-ի սնանկության կառավարիչ Ռոբերտ Արամի Մարգարյանը հայտնեց, որ ՙԿոնվերս բանկ՚ ՓԲԸ և ՙԱրմաս՚ ՍՊԸ-ի միջև 05.11.2007թ. կնքվել է վարկային պայմանագիր, գրավի պայմանագիր, որով գրավադրվել է ՙՀայպեռլիտ՚ ՍՊԸ-ի շարժական գույքերը /Կռազ 53212 մակնիշի ավտոմեքենա 1հատ, հիդրավլիկ մամլիչ 2 հատ և փքման վառարան 1 հատ և երաշխավորության մասին պայմանագիրը /երաշխավոր Արմեն Մկրտչյան/: Կառավարիչը միաժամանակ հայտնեց, որ ինքը մի քամի անգամ պատշաճ կարգով նշանակել է գույքագրում /25.08.2008թ. և 10.10.2008թ./, սակայն գույքագրում չի կատարվել պարտապանի /նույն դիմումատու Արմեն Մկրտչյանի/ չներկայանալու պատճառով: Այնուամենայնիվ արդեն 25.01.2010թ-ին նախապես նշանակված գույքագրման ժամանակ կառավարչին ներկայացվել է գույք, սակայն ոչ պարտապանի և ոչ էլ գրավատու` ՙՀայպեռլիտ՚ ՍՊԸ-ի կողմից չի ապահովվել նշված գույքերի փաստաթղթերը, որով հնարավոր կլիներ այդ գույքը նույնականացնել: Բացի այդ փակ է եղել Կռազ 53212 մակնիշի ավտոմեքենան, ինչի պատճառով հնարավոր չի եղել պարզել թափքի և շարժիչի համարները:
Կառավարիչը հայտնել է, որ 25.01.2010թ-ին կազմված գույքագրման մասին ակտը ստորագրվել է պարտապանի` ՙԱրմաս՚ ՍՊԸ-ի տնօրենի, ՙՀայպեռլիտ՚ ՍՊԸ-ի /որը հանդիսանում է նույն դիմումատու և երաշխավոր Արմեն Մկրտչյանը/, ՙԱրմաս՚ ՍՊԸ-ի սնանկության գործով կառավարիչ Ռոբերտ Արամի Մարգարյանի, և ՙԿոնվերս բանկ՚ ՓԲԸ-ի կողմից: Ի դեպ ՙԱրմաս՚ ՍՊԸ-ի սնանկության կառավարիչ Ռոբերտ Մարգարյանը և ՙԿոնվերս բանկ՚ ՓԲԸ-ն 25.01.2010թ. ակտը ստորագրալ են վերապահումով: Կառավարիչը հայտնել է նաև, որ պարտապանի կողմից իրեն չեն հանձնվել հաշվապահական և այլ փաստաթղթեր, իսկ ներկայացված կրեդիտորների և դեբիտորների ցուցակը իր մեջ պարունակել է ոչ հավաստի տեղեկություններ /նշվածը հավաստվում է սնանկության վարույթի ընթացքում որոշ կրեդիտորների կողմից ներկայացրած պահանջներով որոնք առկա չեն եղել պարտապանի կողմից ներկայացված ցուցակում/:
Այնուհետև կարգապահական հանձնաժողովի կողմից հարց տրվեց դիմումատու` Արմեն Մկրտչյանին, թե ինչու վերջինս` որպես պարտապան ՙԱրմաս՚ ՍՊԸ-ի տնօրեն չի կատարել իր պարտականությունը, այն է կառավարչին չի հանձնել ընկերության փաստաթղթերը և որպես ՙՀայպեռլիտ՚ ՍՊԸ-ի տնօրեն ինչու չի ապահովել գույքագրման ժամանակ գույքերի պատշաճ հանձնում, մասնավորապես ինչու վերջինս հնարավորություն չի տվել /ապահովել պայմաններր/ գույքը նույնականացնելու համար: Նշված հարցադրման կապակցությամբ դիմող Արմեն Մկրտչյանը հայտնեց, որ մոտակա երկու օրվա ընթացքում նա կարող է ապահովել դա:
Դիտորդ խորհրդի անդամներ Ա.Չիտչյանը և Լ.Պետրոսյանը նշեցին, որ դիմումատու` Արմեն Մկրտչյանը ոչ թե մոտակա երկու օրվա ընթացքում պետք է ապահովեր գույքագրման պատշաճ կատարումը, այլ կառավարչի առաջին իսկ նշանակած գույքագրման ժամանակ, որը մինչ օրս կատարված չէ:
Այս դիրքորոշումը լսելուց հետո Արմեն Մկրտչյանը կրկին հայտնեց, որ բարձրացված հարցադրումները չեն վերաբերվում բուն դիմումին:
Այնուհետև կարգապահական հանձնաժողովը միաձայն որոշեց Արմեն Մկրտչյանի դիմումը և դրան կից փաստաթղթերը ուսումնասիրելու համար հետաձգել լսումը, կարգապահական հանձնաժողովի նիստ նշանակել և 10.05.2011թ. ժամը 15-00-ին: